ATMEYDAN

ATMEYDAN

dicitur hodie locus Constantinopoli, qui Hippodromus olim, 550. passuum longitudine, 120. latitud. in quo, tempore Graecorum Imperator. Ludi Circenses aliaeque festivitates celebrabantur. Columnae ibi quinque etiamnum visuntur, inter quas pyramis insignis, hieroglyphicis characteribus undique oppleta: in cuius basi Theodosius Imperator conspicitur, cum filiis Honorio et Arcadio totaque Aulae Imperatoriae pompa. Ab uno latere loci Serralium quoddam vetus visitur, ab altero Mesquita nova Sultanis Achmeti, ommum, quotquot in illa urbe sunt, magnificentissima; exceptâ illâ, quam Mahometis hodienum imperantis mater exstruxit: qua de utraque, ut et plura de hodierna Hippodromi huius facie, vide apud Petrum de Valle Itiner. Tom. I. et Iac. Sponium Itiner. Part. 1. p. 231. et seqq.